page hit counter
Monday , October 23 2017
Breaking News
Home / උණුසුම් පුවත් / ‘‘දුවගේ සැත්කම වැරදුණා කියලා මාධ්‍යට ප්‍රකාශ දෙන්න ලෑස්ති වෙන්න එපා..‘‘ මහනුවර රෝහලේ ප්‍රධාන වෛද්‍යවරියගේ කෙරුවාව මෙන්න

‘‘දුවගේ සැත්කම වැරදුණා කියලා මාධ්‍යට ප්‍රකාශ දෙන්න ලෑස්ති වෙන්න එපා..‘‘ මහනුවර රෝහලේ ප්‍රධාන වෛද්‍යවරියගේ කෙරුවාව මෙන්න

‘‘ඔයාලගේ දුවගේ සැත්කම ධන පැත්තට හැරෙන්නත් පුළුවන් සෘණ පැත්තට හැරෙන්නත් පුළුවන්. හැබැයි සෘණ පැත්තට හැරුණා කියලා මාධ්‍යයට ප්‍රකාශ දෙන්න ලෑස්‌තිවෙන්න එපා. ඔයාලා මාධ්‍යයට මොනවා කිව්වත් අපිට ඇති ප්‍රශ්නයක්‌ නෑ අපිට වැඩකුත් නෑ. කොහොමත් ඉතින් මාධ්‍ය එක එක දේවල් කියන එක සාමාන්‍ය දෙයක්‌නේ‘‘.

සාර්ථක හදවත් සැත්කමකින් පසු තම දියණිය ජීවිතයේ නව පරිච්ඡේදයක්‌ අරඹණු ඇතැයි මහත් අපේක්‍ෂාවෙන් සිටි අසරණ මාපිය යුවළකට මහනුවර මහ රෝහලේ ප්‍රධාන වෛද්‍යතුමියගෙන් අසන්නට ලැබුණේ හදවතට පිහිපහරක්‌ එල්ල කරනු හා සමාන එවන් වදන් වැළක්‌ බව එම දෙමාපියෝ කියති.

සැත්කමට දින කීපයක්‌ තබා අසන්නට ලැබුණු එම රළු වදන්වලින් තම දහනව හැවිරිදි සචිනි සෙව්වන්දි කළුපෙරුම දියණියගේ ජීවිතය පිළිබඳව අස්‌ථිරතාවක්‌ මතුවූ නිසාවෙන් ඩබ්. ප්‍රියංකා නිල්මිණි (42) මහත්මියත්, චමින්ද මහේෂ් කුමාර (45) මහතාත් සැත්කම සිදුවන මොහොත දක්‌වා ගෙවුණු සෑම තත්ත්පරයක්‌ම හදවත දැවෙමින් ගත කළ බව පවසති.

අලුත්ගම, කළුවාමෝදර ප්‍රදේශයේ ජීවත්වන ප්‍රියංකා චමින්ද යුවළට දියණියන් දෙදෙනකු සහ පුංචි පුතකු වෙති. එම සෙනෙහෙබර කැදැල්ලෙහි සතුට වියෑකී යන්නට පටන් ගත්තේ 2012 වසරේදී තම වැඩිමහල් දියණිය වූ වින්ද්‍යා ලක්‌මිණි දියණිය වයස අවුරුදු 16 දී හදවත් රෝගයක්‌ නිසා සදහටම ඔවුන්ගෙන් වෙන්වීම හේතුවෙනි. එතැන් පටන් එක්‌ දියණියකගේ ආදරය පමණක්‌ ලද මෙම මාපිය දෙපළට අද වන විට ඇයගේ සෙනෙහසද අහිමිව ගොසිනි. එය කොතැන, කාගේ හෝ වරදකින් සිදුවූවාද. අසරණ දෙමාපියන්ට අද ඉතිරිව ඇත්තේ අහිමිවි ගිය දියණියන්ගේ සොඳුරු මතක හා මව් ඇකයේ තවමත් වෙළෙන පොඩි පුතු නවෝද් නෙත්සිතුම්ගේ (14) ආදරය පමණි.

මහනුවර මහ රෝහලේ හදවත් සැත්කම් සාර්ථකව කරනවා කිව්වම මගේ දුවට අලුත් බලාපොරොත්තුවක්‌ ඇතිවුණා. එයා ගොඩාක්‌ සතුටින් ඉන්න පටන් ගත්තා. මීට පෙර හදවත් සැත්කම කරපු කෙනා හොඳ සෞඛ්‍ය තත්ත්වයේ ඉන්න නිසා අපිත් සතුටින් සැත්කමට ලෑස්‌ති වුණා. සචිනි අපි හැමෝටම වැඳලා මේ අවුරුද්දේ මාර්තු 27 ගෙදරින් පිටවුණේ සනීපවෙලා ආපහු එන බලාපොරොත්තුවෙන්. ඒත් සචිනි දුව ආවේ කිසිම හැලහොල්මනක්‌ නැතිව මේ විදියට පෙට්‌ටියකින්.

සචිනි දියණියගේ වියෝවෙන් කම්පිතව සිටි ප්‍රියංකා නිල්මිණි මහත්මිය එලෙස සචිනිගේ නිසල දේහය අසල හඬා වැටුණා.

අලුත්ගම සංඝමිත්තා බාලිකා විද්‍යාලයේ ආදි ශිෂ්‍යාවක වූ සචිනි රෝගී තත්ත්වයෙන් පසු වුවද ඉගෙනීම් කටයුතුවලට දැක්‌වූයේ මනා දස්‌කමකි. අඩි කීපයක්‌ හෝ පයින් යාමට නොහැකි ඇයට වරින්වර දැඩි මහන්සියක්‌ දැනුණු නිසාම අ.පො.ස. සාමාන්‍ය පෙළ විභාගයෙන් පසු තම අධ්‍යාපන කටයුතු මගහැරී ගියේ කාලයටත් හොරාය. අධ්‍යාපනය ක්‍රමයෙන් ගිලිහී ගියද ආදරණීය මවත් පියාත් පුංචි මල්ලීත් අතහැර ජීවිතයෙන් ගිලිහී යන්නට අකමැති වූ සචිනි බලාපොරොත්තු දහසක්‌ මැද අනාගතය ගොඩනැඟුවේ කාගේත් ප්‍රාර්ථනා ඉටුකරන ආශාවෙනි. එහෙත් ඇය තුළ වූ අනාගත පැතුමන් සදහටම සඟවාගෙන දැත ළයෙහි බැඳ නිසලව සිටින්නේ හිත මිතුරු සැමගේම ප්‍රාර්ථනාවන්ද සිඳලමිනි.

මුලින්ම දුව සැත්කමට ලෑස්‌ති කළේ විෂ බීජ නාශකයක්‌ මුසු කළ විශේෂ ශැම්පු වර්ගයකින් නාවලා පිරිසිදු කරලයි. ඒත් වෛද්‍යවරුන්ගේ ප්‍රශ්නයක්‌ නිසා ඒ සැත්කම නැවතුණා. සචිනි දුවට බද්ධ කරන්න තිබුණ හදවතත් ඒ නිසා විනාශ වෙලා ගියා. ඊට පස්‌සේ ගැලපෙන හදවතක්‌ ලැබෙන කල් රෝහලේ සිටියා. අපිට තවත් හදවතක්‌ ලැබුණා. ඒ නිසා හදවත බද්ධ කරන්න වෛද්‍යවරු කටයුතු සූදානම් කළා.

ඔපරේෂන් එකෙන් පස්‌සේ මගේ දුව හුස්‌මගන්න වේගය ගොඩාක්‌ වැඩිවෙලා තිබුණා. ඒ වගේම අත යටින් ලේ ගොඩක්‌ යනවා මම දැක්‌කා. ඒ ගැන වෛද්‍යවරුන්ට කිව්වම ඒ අය දුවගෙන ආවා. පස්‌සේ කිව්වා ඒක සාමාන්‍යයි කියලා. දොස්‌තරලා සාමාන්‍යයි කියපු මගේ දරුවා සැත්කමෙන් දවස්‌ දෙකකට පස්‌සේ අප දාලා යන්න ගියා.

දරුවා නැති වුණාට පස්‌සේ මහනුවර මහ රෝහලේ ප්‍රධාන වෛද්‍යතුමිය කිව්වා සැත්කමට පස්‌සේ බෙහෙතක්‌ ගෙන්වලා දෙන්න තිබුණා. ඒත් ඒ බව අපිට දන්වන්න සැත්කම කරන දවස හරියට දැනගෙන හිටියේ නෑ කියලා. ඒත් සැත්කම කරපු වෛද්‍යවරයා කියන්නේ සැත්කම අති සාර්ථක නිසා එවැනි බෙහෙතක්‌ අවශ්‍ය වුණේ නෑ කියලයි. මමත් කියන්නේ සැත්කම සාර්ථකව සිදුවුණා කියලයි. මොකද සැත්කම කළාට පස්‌සේ දරුවා හොඳට හිටියා. දරුවා ගැන දැඩිසත්කාර ඒකකයේ කිසි කෙනෙක්‌ සැලකිලිමත් වුණේ නෑ. මගේ අහිංසක දරුව පැත්තකට දාල තිබුණේ සාමාන්‍ය රෝගියෙක්‌ ගාණට.

මෙම මරණය නිසා තමන්ගේ තර්කය නිවැරැදි බව පෙන්වන්න රෝහලේ ප්‍රධාන වෛද්‍යතුමියයි සැත්කම කරපු වෛද්‍යවරුයි දෙපැත්තට බෙදිලා කඹ ඇදිල්ලක නිරත වුණා. අන්තිමට ඒකේ ප්‍රතිඵලය වුණේ මගේ අසරණී මට නැතිවුණ එක විතරයි. මගේ දරුවගෙ මරණය සම්බන්ධයෙන් විධිමත් පරීක්‍ෂණයක්‌ කරන්න කියලා මම සෞඛ්‍ය ඇමැතිතුමාගෙන් ඉල්ලා සිටිනවා. මේ වෛද්‍යවරුන්ටත් ළමයි ඇති. ඒ අයට මොනවහරි වුණොත් ඒ අයට වේදනාවක්‌ නැද්ද? ඒ වේදනාවම තමයි අපිටත් තියෙන්නේ. මගේ දරුවා නිකරුණේ මියගියේ වෛද්‍යවරුන්ගේ නොසැලකිල්ලයි. අහංකාරකම හින්දයි. මේ සිද්ධිය පිටිපස්‌සේ සැඟවුණු දේවල් ටිකක්‌ තියෙනවා. පිංසිදුවෙයි වගකිවයුතු අය මැදිහත්වෙලා මට ඒ දේවල් සොයා බලා දීලා මගේ දුවට සාධාරණය ඉටුකරලා දෙන්න.

සචිනි දියණියගේ අකල් මරණය පිළිබඳව වාවාගත නොහැකි සොවින් චමින්ද මහේෂ් කුමාර මහතා එලෙස මෙම සිද්ධිය පිළිබඳ අනාවරණය කළේය.
නෙත්පුවත් ඇසුරින්


Check Also

මොවුන් ගැන තොරතුරක් දන්නවානම් වහාම දැනුම් දෙන්න – පොලීසිය ඔබේ සහය පතයි

ගම්පහ රෝහල අසළදී මෝටර් රථයක් තුළ තිබී ටී 56 වර්ගයේ ගිනි අවි 03 ක් සොයාගැනීමේ …

Leave a Reply

Your email address will not be published. Required fields are marked *

error: Content is protected !!